Gameleiros

Gameleiros é un libro cálido, fermoso, coidadosamente editado, que retrata, a través da cámara do fotógrafo Manuel Alvarez, residente en Xenebra, Suiza, os rostros dos mariñeiros da Galicia, nunha amplísima serie de fotografías feita na vila da Guarda. Os mariñeiros protagonizan o libro con eses rostros tan humanos, que falan desde a plasticidade dos primeiros planos. Tras cada fotografía, un poema de Miro Villar completa o retrato do fotógrafo cunha breve pero intensa pincelada literaria realizada expresamente para cada un dos gameleiros. As fotografías, realizadas en setembro de hai dous anos, na Guarda, definen a alma deses 27 mariñeiros de baixura que o lector pode contemplar nun libro que é unha pequena obra de arte e toda unha homenaxe á forza humana do mar de Galicia.Gameleiros é un libro que volve os seus ollos cara ó mar galego nun momento tráxico para o país,  que dá idea da riqueza e da importancia dese mar, tan humano e tan insertado na alma de todos os galegos e galegas. E outro libro sobre o  mar que Xerais publica, ese mar que é corazón das xentes, dignidade dos mariñeiros e que agora, por enriba de todo, cómpre defender.Punta Orelluda, Limpo de Saní, A Laxe, Baixo de Oia, O Bico, Pedra do Francisco, As loucenzas... son algúns dos topónimos mariñeiros aos que  nos remiten e que evocan os rostros destes homes de mar.